ప్రాజెక్టులు రెండేళ్లలో పూర్తి — కాళేశ్వరం గొప్ప అనేది భ్రమే: సీఎం రేవంత్ రెడ్డి

రేవంత్ రెడ్డి రాష్ట్రంలోని పెండింగ్ సాగునీటి ప్రాజెక్టులన్నింటినీ రెండేళ్లలో పూర్తి చేస్తామని స్పష్టం చేశారు. అవసరమైన భూసేకరణ, నిధుల సమీకరణ కోసం ప్రభుత్వం కట్టుబడి పనిచేస్తుందని తెలిపారు. తెలంగాణ ములుగు జిల్లా కన్నాయిగూడెం మండలం తుపాకులగూడెంలోని దేవాదుల ప్రాజెక్టు ను ఆయన పరిశీలించారు.

ప్రాజెక్టు పురోగతిపై అధికారులతో సమీక్ష నిర్వహించిన అనంతరం మీడియాతో మాట్లాడిన సీఎం, రాష్ట్రంలో సాగునీటి వనరులు పుష్కలంగా ఉన్నప్పటికీ గతంలో సరైన వినియోగం జరగలేదని విమర్శించారు. తెలంగాణ ఏర్పడినప్పుడు 967 టీఎంసీల నీటిని వినియోగంలోకి తీసుకురావాల్సి ఉండగా, ఒక్క కాళేశ్వరం ప్రాజెక్టు పై భారీగా ఖర్చు పెట్టారని తెలిపారు.

కాళేశ్వరం నుంచి నీరు ఎత్తకపోయినా రాష్ట్రంలో రికార్డు స్థాయిలో వరి పంట పండిందని, అందువల్ల ఆ ప్రాజెక్టు గొప్పదనే భావన భ్రమగా తేలిందని వ్యాఖ్యానించారు. దేవాదుల ప్రాజెక్టు మొదట రూ.5,000 కోట్ల అంచనాతో ప్రారంభమై ఇప్పుడు రూ.18,500 కోట్లకు పెరిగిందని చెప్పారు. భూసేకరణకు ఇప్పటికీ నిధులు వెతకాల్సి వస్తోందన్నారు.

రాష్ట్రంలోని అన్ని గోదావరి పరివాహక ప్రాజెక్టులపై సమగ్ర సమీక్ష నిర్వహిస్తామని తెలిపారు. గోదావరి నుంచి ఒక్క చుక్క నీరు కూడా వృథా కాకుండా వినియోగిస్తామని చెప్పారు. అలాగే కృష్ణా జలాల వాటాల విషయంలో పోరాటం కొనసాగుతుందని స్పష్టం చేశారు. నీటి వివాదాలపై అసెంబ్లీలో సమగ్ర చర్చ జరగాల్సిన అవసరం ఉందన్నారు.

భారత రాష్ట్ర సమితి (బీఆర్ఎస్) పై కూడా సీఎం విమర్శలు గుప్పించారు. చౌకబారు ఆరోపణలతో ప్రజలకు ప్రయోజనం లేదని, మంచి ప్రతిపక్షంగా పనిచేసే అవకాశం వారికి ఉందన్నారు. పక్క రాష్ట్రాలతో చర్చల ద్వారా సమస్యలను పరిష్కరించేందుకు ప్రభుత్వం సిద్ధంగా ఉందని తెలిపారు.

తమ ప్రభుత్వానికి ఇప్పటివరకు రెండేళ్ల అనుభవమే ఉన్నప్పటికీ మరింత మెరుగైన పాలన అందించేందుకు సూచనలు స్వాగతిస్తామని రేవంత్ రెడ్డి పేర్కొన్నారు. ఎంపీ ఎన్నికల నుంచి మున్సిపల్ ఎన్నికల వరకు ప్రజల తీర్పు వచ్చినా బీఆర్ఎస్ వైఖరిలో మార్పు కనిపించడం లేదని ఆయన వ్యాఖ్యానించారు.