రెపో రేటు యథాతథం: ఈఎంఐల ఊరటకు బ్రేక్, మధ్యతరగతికి ఆర్బీఐ నిర్ణయం నిరాశ

ఫిబ్రవరి 6, 2026న రిజర్వ్ బ్యాంక్ ఆఫ్ ఇండియా (ఆర్బీఐ) ప్రకటించిన మానిటరీ పాలసీ నిర్ణయం మధ్యతరగతి ప్రజలకు నిరాశనే మిగిల్చింది. వడ్డీ రేట్లు తగ్గుతాయని, దాంతో హోమ్ లోన్లు, కార్ లోన్ల ఈఎంఐలు కొంతైనా తక్కువ అవుతాయని ఆశించిన సామాన్యులకు ఈసారి ఊరట దక్కలేదు. ఆర్బీఐ గవర్నర్ సంజయ్ మల్హోత్రా నేతృత్వంలోని ఆరుగురు సభ్యుల మానిటరీ పాలసీ కమిటీ ఏకగ్రీవంగా రెపో రేటును యథాతథంగా 5.25 శాతంలో కొనసాగించాలని నిర్ణయించింది.

గత ఏడాది కాలంలో ఆర్బీఐ వరుసగా 125 బేసిస్ పాయింట్ల మేర వడ్డీ రేట్లు తగ్గించి ఆర్థిక వ్యవస్థకు, రుణగ్రహీతలకు కొంత ఉపశమనం కలిగించిన విషయం తెలిసిందే. అయితే ఈసారి మాత్రం “వేచి చూసే ధోరణి” (Status Quo)ను కొనసాగించనున్నట్లు గవర్నర్ స్పష్టం చేశారు. వడ్డీ రేట్లను తక్షణం తగ్గించకపోవడానికి గల కారణాలను కూడా ఆర్బీఐ వివరించింది.

దేశ ఆర్థిక వ్యవస్థ ప్రస్తుతం 7.3 శాతం వృద్ధి రేటుతో బలంగా ఉన్నప్పటికీ, అంతర్జాతీయంగా నెలకొన్న భౌగోళిక రాజకీయ ఉద్రిక్తతలు, గ్లోబల్ వాణిజ్య సవాళ్లు భవిష్యత్‌లో ఆర్థిక స్థిరత్వానికి ముప్పుగా మారవచ్చని గవర్నర్ మల్హోత్రా హెచ్చరించారు. ఈ పరిస్థితుల్లో తొందరపడి వడ్డీ రేట్లు తగ్గించడం సముచితం కాదన్న అభిప్రాయాన్ని కమిటీ వ్యక్తం చేసింది.

ఇటీవల భారత్–అమెరికా మధ్య కుదిరిన వాణిజ్య ఒప్పందం వల్ల ఎగుమతులకు కొంత సానుకూల వాతావరణం ఏర్పడినప్పటికీ, రూపాయి విలువలో హెచ్చుతగ్గులు, బాండ్ మార్కెట్‌లో కనిపిస్తున్న అస్థిరత ఆర్బీఐని మరింత అప్రమత్తం చేశాయి. అలాగే కొత్త వినియోగదారుల ధరల సూచీ (CPI) లెక్కల ప్రకారం ద్రవ్యోల్బణం ప్రస్తుతం అదుపులోనే ఉన్నా, ఆహారేతర వస్తువులు మరియు సేవల ధరలు పెరుగుతున్న తీరుపై నిఘా అవసరమని మానిటరీ పాలసీ కమిటీ అభిప్రాయపడింది.

ఈ నేపథ్యంలో వడ్డీ రేట్ల తగ్గింపు ద్వారా లోన్ ఈఎంఐల్లో కోత కోసం ప్రజలు మరికొంత కాలం వేచి చూడక తప్పదని తాజా పాలసీ ప్రకటన స్పష్టం చేస్తోంది. రాబోయే పాలసీ సమీక్షల్లో దేశీయ, అంతర్జాతీయ ఆర్థిక పరిస్థితులను సమీక్షించిన తర్వాతే తదుపరి నిర్ణయాలు తీసుకుంటామని ఆర్బీఐ సూచించింది.