మున్సిపల్ ఎన్నికల్లో ఆలోచించి ఓటేయాలి

కాంగ్రెస్–బీఆర్ఎస్–బీజేపీ మధ్య త్రిముఖ పోటీ: సీఎం రేవంత్ రెడ్డి

“గత పాలన, మా రెండేళ్ల పాలనను బేరీజు వేయండి”

హైదరాబాద్, ఫిబ్రవరి 9:
తెలంగాణ మున్సిపల్ ఎన్నికలకు సమయం దగ్గరపడుతున్న నేపథ్యంలో రాష్ట్ర రాజకీయాలు వేడెక్కాయి. ఎన్నికల ప్రచారం సోమవారం సాయంత్రంతో ముగియనున్న క్రమంలో, ముఖ్యమంత్రి ఏ. రేవంత్ రెడ్డి కీలక సందేశం ఇచ్చారు.

సోమవారం నిర్వహించిన మీడియా సమావేశంలో సీఎం రేవంత్ రెడ్డి మాట్లాడుతూ, మున్సిపల్ ఎన్నికల్లో కాంగ్రెస్, బీఆర్ఎస్, బీజేపీల మధ్య త్రిముఖ పోటీ నెలకొందని పేర్కొన్నారు. ప్రజలు ఆలోచించి ఓటు వేయాలని కోరారు. గత ప్రభుత్వ పాలనను, తమ ప్రభుత్వం గత రెండేళ్లలో చేసిన పాలనను బేరీజు వేసుకుని తీర్పు ఇవ్వాలని విజ్ఞప్తి చేశారు.

కేంద్రంలో గత 11 ఏళ్లుగా అధికారంలో ఉన్న బీజేపీ, రాష్ట్రంలో పదేళ్ల పాటు పాలన చేసిన బీఆర్ఎస్ పార్టీలు రాష్ట్ర ప్రజలకు ఏమి చేశాయో చెప్పాలని సీఎం సవాల్ విసిరారు. హైదరాబాద్‌కు సంభవించిన వరదల నష్టానికి ఇప్పటికీ కేంద్ర ప్రభుత్వం నిధులు విడుదల చేయలేదని విమర్శించారు.

మున్సిపల్ ఎన్నికల్లో గెలిస్తే కేంద్రం నుంచి నిధులు తెస్తామని బీజేపీ నేత బండి సంజయ్ చెబుతున్నారని ప్రస్తావించిన సీఎం, “రాష్ట్రానికి 8 మంది ఎంపీలు ఉన్నారు. ఇప్పటివరకు తెలంగాణకు ఏం తీసుకొచ్చారో ముందు చెప్పాలి. గెలిస్తే కేంద్ర నిధులు తెస్తామని చెబితే ప్రజలు నమ్ముతారా?” అని ప్రశ్నించారు.

మున్సిపల్ ఎన్నికలు స్థానిక పాలనకు ఎంతో కీలకమని, నగరాలు, పట్టణాల అభివృద్ధి కోసం ప్రజలు సరైన నిర్ణయం తీసుకోవాలని సీఎం రేవంత్ రెడ్డి పిలుపునిచ్చారు.